ليه بعشق الفسيخ اللي إنت بتكرهه ؟؟ بقلم :محمد سلامه

img

ليه بعشق الفسيخ اللي إنت بتكرهه ؟؟
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
موضوع من قديم الازل ، وبيتجدد الجدال فيه مع كل يوم شم النسيم ،
سؤال بيطرحه اعداء الفسيخ لعشاقه ، ألا وهو : إنتو ازااااي كده !!
حد ياكل كلب ميت بالشكل والريحة العفنة دي ؟؟!!
وهنا ،، كان لازم يبدأ الكلام الجد ، والحوار المنطقي ،، شوف ياسيدي :
أولاً : كل عشاق الفسيخ وكل اللي بيكرهوه بدون إستثناء ،
لو مرو جنب اي جثة نافقة ، الكل هيكتم نفسه ويمشي بسرعة يبعد عن المكان ،
لانه مشمئذ وكاره رائحة الجثة المتعفنة ايً كان اصلها ، وده معناه :
إن بالفعل الشيئ الغير طيب مابيختلفش عليه إتنين ،
،،،،،،،
ثانياً : كتير منّا بيدخل محل العطور يختار عطر هو ارتاح له ،
بعد ماشم كمممم من العطور اللي ماعجبتهوش ، وبعد مايدفع ثمنه ،
يقابل اللي يقول له : إيه ياعم ريحة الخنفري اللي انت حاططها دي ؟!
وبيضحكو مع بعض ، برغم انها فعلاً أصبحت نقطة إختلاف !!
وده معناه : إن الروائح من الخواص اللي بتختلف فيها وجهات النظر ،
زي الالوان والطعم والمذاق ، ومقاييس اختيار الجنس الاخر الخخخ ،
وكما تفضل صديقي الحبيب Samy Younes قائلاً :
(( رائحة الفسيخ غير رائحة تعفن السمك ، فالأولي : ناتجة عن :
تفاعل كلوريد الصوديوم ( الملح ) مع بروتينات السمك ، وأحماض أمينية و دهون ،
و يود و أوميجا ثري ،، إلخ ، أما الثانية : فناتجة عن : تحلل بكتيري سام ،
تشبه رائحة النوشادر وغازات مركبات الكبريت ،
الأولي : رائحة تميز السمك المحفوظ بالتمليح ، والثانية : رائحة تحلل الجيف )) ،
،،،،،،،
ثالثاً : كل اللي بيكره الفسيخ عنده شيئ تاني بيحبه ، ممكن يكون اسوء من الفسيخ ،
وعلى سبيل المثال : المِش والبسطرمة والريكفورت ، والفشة والكرشة والممبار ،
اللي بيعلقها البائع في تراب الشارع ، تمتص كبريت عوادم السيارات ،
علشان يقطعها ويقليها في السمن أو اللية ، ويقدمها سخنة ، ريحتها تجنن ،
وياكلوها باسم (( حلويات )) ، برغم إن الممبار هو القولون ،
يعني الانبوب الاخير في المعدة ، اللي بيجمع البراز قبل عملية الاخراج !!
هتقول لي بيتغسل وبيبقة قشطة ، هقول لك :
الدفاع بمنطق الحب ، مابيحجبش الحقيقة ،
،،،،،،،،
رابعاً : طهي الطعام ليه طرق كتير متنوعة وقابلة للزيادة والابتكار ومنها :
الخبز والسلق والشوي والقلي والتبخير والتدخين ، والنشر ( القديد ، والبسطرمة ) ،
ومنها التمليح ، يبقى لما نتكلم عن الفسيخ لازم نفتكر انه طريقة من طرق الطهي ،
يبقى السؤال الاخير وهو الفيصل في كل ماذكرنا ، الا وهو :
س : هل الفسيخ نوع من الطعام تم تسويته بطريقة التمليح ؟؟
ام انه نوع من الاسماك الفاسدة ، العفنة ؟؟
الجواب ببساطة : تسمم الاسماك نتيجة فسادها ، بيؤدي للوفااااة ،
فهو اكثر فتكا بالانسان من السم الزعااف ،
يعني لو ده سمك معفن فعلا ، مافيش مخلوق هياكل منه لقمة واحدة ،
الا ومعدته هتتقطع من التسمم ويموت ، علشان كده :
بنسمع عن حالات تسمم بسبب الفسيخ ، ودي الحالات :
اللي بيفسد فيها فيها الفسيخ بالفعل نتيجة : سوء التخزين أو جهل بأصول الصناعة ،
،،،،،،
وأخيراً : صحيح الفسيخ فيه كممم غير عادي من الاملاح اللي بتجهد الكلى ،
لكن الفائدة العظيمة اللي بنكسبها من : البروتين والفوسفور والبصل والليمون ،
والزيت والعيش البلدي ابو ردة ، والأهم من كل ده : (( المزاج الحلو )) ،
(( فرحة العيلة واللمة )) والذكريات الطيبة

الكاتب النافذة الاعلامية

النافذة الاعلامية

مواضيع متعلقة

اترك رد